عندما تخفي العيون الحقيقة - كيف تكتشف كذب مصدر المعلومات في بحوث التسويق

كنا هننضرب في أسيوط.

وتقريباً شبه اتحجزنا في ورشة - لحد ما يتأكدوا إحنا مين. 😁

في مدرسة الواقع عندنا يقين:

كل مصادر المعلومات بتكذب.

مش دايماً بسوء نية لكن لكل واحد دوافعه الخاصة.

ولو إنت بتعتمد على اللي بيتقال لك في المقابلات حرفياً - فحضرتك بتجمع قصص حلوة تتحكي، مش معلومات يتاخد قرار بناءً عليها.

وعشان تفرّق بين الاتنين، لازم تعرف أنواع الكذب الأول.

أنواع الكذب اللي هتقابلها في السوق

1. كذب التفاخر

وبنسبة كبيرة بيكون من طبقة المتحكمين في السوق.

هتلاقيه بيضخّم أرقام، أو حصص سوقية، أو اتفاقات - لا لسبب إلا الظهور بقوة قدامك.

ودورك هنا؟ إنك تكون مذاكر السوق كويس قبل ما تقعد معاه. لأن اللي مش عارف الأرقام الحقيقية، هيسجّل الرقم المضخّم ويمشي.

2. كذب الخوف

وده الأكتر انتشاراً.

معظم طبقات السوق هتتعامل معاك بخوف كبير جداً - إنك ضرايب، أو إنك مزقوق عليه من حد بسبب مشكلة.

وده بالظبط اللي حصل معانا في أسيوط حجزونا في الورشة تقريباً، لحد ما كلّموا المصنع وقالوا لهم إننا تبعهم.

(ودي قصة تانية مختلفة، هنحكي أسبابها لما نتكلم عن مافيا المناديب)

3. كذب التخلّص منك

وده بنسبة كبيرة بيحصل لما ما تعرفش تبدأ الحوار صح.

مصدر المعلومة هيقولك أي كلمتين علشان يقلبك وخلاص، وينهي الموضوع، ويشوف وراه إيه. 😁

والفرق بين النوع ده والنوعين اللي فاتوا: النوع ده غلطتك إنت، مش غلطته.

إزاي تكتشف إن اللي قدامك بيكذب؟

لازم تعرف إن ده بيعتمد بنسبة كبيرة جداً على مهارات الباحث الشخصية في قراءة الموقف وإدارته بالكامل.

وهعرض عليك بعض الحاجات اللي بنعملها — مرتّبة حسب لحظة استخدامها.

أثناء المقابلة

تكرار السؤال بصيغة تانية

بنكرر السؤال بأكتر من صيغة في نفس المحادثة، خلال وقت متباعد شوية، عشان نشوف الإجابة هتفضل ثابتة ولا لأ.

بس خلي بالك: المرة التانية لازم تكون مباغتة - مربوطة بنقطة الحديث في اللحظة اللي بتسأل فيها، عشان توهمه إنها بعيدة عن السؤال الأول.

مثال من السوق:

واحد بيقولك: "أنا حجم مبيعاتي مليون جنيه."

بعد شوية تقوله: "طيب النقل عندك إزاي؟ وعدد العمال كام؟"

فيقولك: "والله عندي تروسيكل واتنين عمال." 😁

يعني مفيش أي رابط بين الإجابتين. والرقم الأول راح.

عينك على الرفوف والمخازن

لو بتعمل دراسة لشركة قائمة، ولما عرّفته بنفسك قالك: "ده المنتج بتاعك بيطير من عندي!" — بيجبر خاطرك. 😁

عينك على الرفوف.

شوف التراب على منتجك. شوف مكانه فين. شوف طريقة عرضه. شوف الكميات الموجودة في المخزن.

لأنك هترجع تتأكد من الموزّع الرئيسي، أو من حجم مشتريات العميل ده من عندك — والرفّ هيكون قال لك الحقيقة قبلهم.

اختبار المعلومة غير المؤكدة

ودي أداة قوية، بس بتتلعب بحرص شديد - خصوصاً مع حد تقيل.

الفكرة إنك تطرح معلومة إنت نفسك مش متأكد منها - عن السوق، أو عن منتج، أو عن تحرّك من المتحكمين - وتشوف رد فعله.

هيصححها لك بمعلومة أدق؟ يبقى ده مصدر بيعرف.

هينكرها من غير تفاصيل؟ يبقى مش عنده.

هيجاريك ويبدأ يزوّد من عنده ويهبّد؟ يبقى بيمثّل إنه عارف - وكل اللي قاله قبل كده محتاج مراجعة.

والفرق مهم: إنت بتطرح حاجة غير مؤكدة، مش بتخترع كذبة. الأولى اختبار مشروع بتخرج منه بمعلومة أصح. والتانية بتحرق مصدر ما تعرفش هتحتاجه إمتى — وسمعتك في السوق أغلى من أي معلومة.

لحظة الخروج

وإنت بتسلّم وماشي

دي من أهم اللحظات في المقابلة كلها.

المصدر بيكون خلاص اطمن إنك مش خطر، والرسمية انتهت - وهنا بتتقال معلومات ما اتقالتش طول القعدة، أو بتتقال بشكل عرضي.

متستعجلش الخروج. ومتقفلش النوتة بدري.

بعد المقابلة

تدوير المعلومة

ودي نقطة مهمة جداً.

بناخد معلومة معينة وصلت لنا من مصدر، ونبدأ نعيد تدويرها على مصادر تانية بصيغة معينة - عشان نتأكد من صحتها.

والمعلومة اللي بتعدّي من تلات مستويات مختلفة في هرم السوق وتفضل ثابتة… دي المعلومة اللي تبني عليها.

الخلاصة

خدها قاعدة كده - بفضل الله من شغلنا:

إنت كباحث مش جهاز تسجيل. إنت فلتر بشري.

الحقيقة في السوق ما بتتسمعش بالأذن بس.

إنت بتشمّها في ريحة التراب في المكان. بتشوفها في حركة العمال. وبتفهمها من السكوت بين الإجابات وقبل التفكير.

الورق ممكن يكون فيه معلومة كذب.

لكن السوق الفعلي ما يقدرش يخبّي الحقيقة كتير.

وخليني أسيبك بسؤال للمقال الجاي:

لو مصدر المعلومة اتأكد إنك مش خطر عليه - إيه اللي بيتغير في الكلام؟ وليه ده بالذات هو مفتاح المقابلة كلها؟