تيجي أحيلك قصة ولاء من عميل عمرها أكثر من 30 سنة ..

لما بسمع من حد جملة العملاء بتوعي عارفني وهيقفوا جنبي وهنسند بعض بفتكر على طول القصة اللي قبلناها في دراسة وقبل ما احكيلك ما تركزش مع صورتي اللى شبه الواد العريس بتاع التجربة الدينماركية

في رحلة دراسة سوق وكان من ضمن أهدافها إعادة الإتصال والتنشيط مع العملاء القدامي قابلنا واحد من التجار وشيوخ المجال اللى بندرسة ولما قلنا له إحنا تبع فلان ما أقولكش على اللى عمله ..

الحاج فلان دا لحم كتافي من خيره دا هو اللى عملني بعد ربنا وخلاني معلم ليا إسمي دا انا الوحيد اللى لما بدأت قدملي بضاعة بالأجل بيجي 50 ألف جنيه ودا في التسعينات رقم كبير جداً وساعدني في جواز إبني و……….
وبالمناسبة دا كله حصل فعلاً

من كتر ما الراجل دا إتكلم على الحاج والمصنع انا قلت لمحمد اللى معايا ع الواتساب شكله عامل للحاج صنم عجوة ورا الكرسي وكتبت ملاحظة كدا أصيل جداً للحاج سيد ( هاتلاقي الصورة فى التعليقات ) 

خلصنا الزيارة يا معلم واتفقنا معاه على الشغل وتنشيط البيع والكوتة البيعية واخدنا منه المعلومات وكملنا زيارات لحد ما عرفنا الحقيقة المضحكة والمؤلمة ..

العميل دا بقى يا سيدي هو أكبر سبب أسباب خسارة الحصة السوقية للمصنع بتاعنا لأنه كان بياخد البضاعة يشيل اللوجو من عليها يحطها فى كراتين المنافسين ويبيعها بإسم المنافس 

معتمد على الجودة العالية مع السعر التنافسي فبيحقق أرباح جبارة.

#الشاهد
في ظل التقلبات ولاء معظم العملاء للجنيه يا حجيج ولو لقى فرق ربع جنيه عند المنافس مكسب هيروح له ومش هيسمي عليك وعلشان كدا عينك على بضاعتك في السوق لازم تكون 24 ساعة فى ال24 ساعة ..

مخزون السوق لازم يكون عندك مش عند التجار ولا الموزعين علشان إنت هتزعل وتجيب ناس تزعل معاك والعميل اللى هتقول دا ولائه ليا هياكل صنم العجوة بتاعك بعد ما المندوب يمشي من عنده ..

شايف الرسمة اللى قدامك دي من أحدث أعمالنا في دراسة الأسواق في مجال ما لكن المشترك بينها وبين كل المجالات التانية هي فترات الإستقرار الوهمي واللى المفروض الناس تكون عرفتها وبتستعد لها من قبلها لكن كل مرة نفس الولولة

فترة إستقرار وهمي وبعدها :
– طلب بيقل
– تكاليف إنتاج زيادة
– خسارة خصة سوقية للمنافسين
– خروج لاعبين من السوق ودخول ناس جديدة
– علاقات تجارية بتدهور وبتكون سيئة
– حيتان بيزيد فحشهم وتحكمهم فى السوق
– تحول رأس المال العامل للمراحل الأعمق داخل السوق الموازي
– تأثيرات المجتمعية واللي بتنعكس على الموظفين نفسهم
– وغيره وغيره وغيره ………

طيب ما الدولة نفسها في خطتها المعلنة وفقاً للتصريحات الرسمية قايلة دا من بدري وبالأخص في الفترات الأخيرة إنت ليه ما بتعملش حسابك وتأمن السوق بتاعك والمستهدف ؟

فيه ناس معتقدة للأسف إن السوق والحاجة هترجع زي الأول ودا بقى من المستحيلات زي بالظبط اللى منتظر اللحمة ترجع ب45 جنيه تاني 

الغلطة بقى اللي الناس بما بتتعلمش منها هي إنها بخيلة على مشروعاتها وعلى سوقها وعلى نفسها فى الفهم وكل مرة بتكتشف إن أرخص حاجة عندها كانت الفلوس .

والسؤال كمشروعات مفروض نعمل إيه علشان نعدي الفترات دي ونحاول نخلق إستقرار موازي لمشورعاتنا والتعامل كفعل مع الإستقرار الوهمي للسوق ؟

المعلومة الميتة في دراسة السوق هي معلومة بخصوص مجال العميل بشكل مباشر لكن هي غير ذات جدوى بنسبة كبيرة للعميل لكن في وقت كدا لازم تحييها مرة تانية لمصلحته

قبل ما أقولك لعبنا بيها إزاي فأحب أنوه إن الصورة رقم واحد في بيت مصدر معلومة في السوق الموازي في قرية من قرى البداري رحنا عليه يوم جمعة بعد ما كنا مش عارفين نقابله  اللي هو لا هجيبك هجيبك 

كانت الدراسة في مجال البلاستيك الخاص بالمستحضرات الصحية والمصنع في بدايته مع دراسة السوق إكتشفنا حجم طلب كبير على منتجات بلاستيكية منها الجركن اللي متصور بيه دا  ومتتجات تانية ..

في اللحظة دي بكلم العميل الأول يقدر يوفرها لأن هنا أصبح نموذج دخل وكان الرد حالياً لا ، لا تصنيع ولا توريد وللأسف مصانع تانية كمان طلبت أوردرات بحجم طلبيات أكتر من المليون بشوية حلوين 

 أصبحت المعلومة هنا معلومة ميتة

طيب نتتقل للصورة رقم ٢ عميل مستهدف من أكبر الموزعين في إسكندرية وأجوارها لما رحت أقابلة بكل أدب أعتذر لأنه حالياً مش محتاج توريد من مصانع جديدة وهنا لازم نحيي المعلومة الميتة 

بلغته إن فيه طلبيات في الصعيد من خلال بحثنا بواحد واثنين لو يقدر هو يوفرها توريد لأن المصنع جديد ومش هيقدر يوفرها هنا الوضع اتغير تماماً والصورة زي ما أنت شايف كدا معاه في المخزن بتاعة بصور كل المنتجات اللي عنده واللي المصنع مهتم بتصنيعها مع معلومات عن إيجابيات وسلبيات كل منتج وكمان بعدها بيومين كان العميل قاعد معاهم وفتح قنوات إتصال معاهم 

#الشاهد
عمليات البحث العميق والربط والملاحظة مع عمليات عرض المعلومات في وقتها مهارة دقيقة وحساسة ومهمة جداً في اللعب مع السوق المجتمعي في مصر ..

للأسف الشديد قصة مكررة
يا جماعة الخير مفيش إستشارات لمشروعات بدون أعمال معايشة على أرض الواقع للمشروع .
– مفيش معايشة بدون وضوح في الأرقام الصريحة من صاحب المشروع
– مفيش معايشة بدون لقاءات مع العاملين فى المشروع بشكل منظم
– مفيش إستشارات بدون تحليل بيانات سابقة وحالية

الإطمئنان المبالغ فيه على حجم الدخل يدون متابعة واضحة وصريحة بيقلب بكارثة في الآخر وللأسف دي مش أول مرة نشوفها بالأخص مع الناس اللي شغاله كويس جداً ومن زمان لكن بيفاجأ عند الأزمات بالكوارث الداخلية..

مفيش حاجة إسمها طول ما ماشية ما تلعبش فى حاجة علشان ممكن تكون ماشية لمصلحة ناس تانية غيرك وممكن تكون ماشية وفيه شرار لو ما أخدتش بالك منه هيجي فجأة ويولع المركب كلها او سوس بينخر فى الأساس وهتقع على رأس الكل .

– والله العظيم مافيه إستشارات لمشروعات قائمة على تليفون أو ستامبة أسئلة جاهزة وكام كلمة وسلام عليكم .

نتم يا بتوع بحري بقينا نعرفكم من نظرة عنيكم نعرف مين اللى جاي يشتغل ومين جاي يخبط خبطة ويجري …

الجملة دي اتقالت لنا فى أسوان ومن مستهلك نهائي مش عميلنا المباشر وكانت بداية الطريق نعرف معادلة دخول الصعيد ونركز عليها فى المعاملات

قبل ما أقولك المعادلة فحابب أنصخك أوعي تغلط غلطة اللي قبلك فى التعامل مع أهل الصعيد إنهم مش عارفين حاجة وهنروح نرمي فرز المنتجات هناك وخلاص .

الراجل دا في قعدته قال إنتم بتيجوا من بحري ترموا الفرز التالت والرابع والعاشر كأنه فرز اول على إعتقاد إننا مش عارفين لكن دلوقتي لو ما لقتش اللى محتاجة بتصل بأي حد في القاهرة يتشريه ويشحنه …

وركز دا مستهلك نهائي يعني الكلام كان فى العموم وعلى أكثر من حاجة مختلفة والنقطة دي مهمة هقولهالك فى التعليقات.

بص بقى يا سيدي الصعيد هو السوق البكر لمصر 4 سنين تقريباً حالياً بندرسة فى مجالات مختلفة من أسوان لحد الفيوم بجميع المراكز معادلته الرئيسية للنجاح
(( أمانة + جودة + سعر = إستمرارية ))
سواء بتأسس أو بتنشط

الصورة دي لها زاوية مختلفة علشان تفهم ليه قعدت القاعدة دي علشان أفتح أقرب نقطة إتصال شخصي ممكن ناخد منها معلومة مهمة وكانت مهمة جداً كمان وهي من اهم مهارات دراسة السوق وبحوث التسويق فى #التفاوض_المعلوماتي

البيع الآجل حالياً خطر جداً لو مضطر تبيع آجل بيع على عقود طويلة الأجل بنسب تضخم متفق عليها ( وهتترفض  )

أو بيع آجل على أسبوع ..

أو تعمل زي ما بنعمل في اتفاقات فتح الخطوط التوزيع والمراجعة
عاوز تشتري آجل بكام ؟
ب١٠٠ ألف
هتدفع منهم كام ؟
٥٠ ألف
طيب خد بالخمسين ألف بضاعة ولو معدل الدوران عندك سريع هنمضي تعاقد ( كوتة توزيع ) بتوفير عند الطلب مباشرة بأولوية توزيع وفقاً لحجم مبيعاتك والخط والمنطقة المغطاة .

 خلي بالك في تطبيق النظام دا لازم تكون دارس خطوط التوزيع كويس جداً وحجم الأشخاص المستهدفين والمناطق المغطاه ومجهز البدائل ( اشخاص – شركات – معارض ) علشان حركة الخلخلة في السوق هتسقط منك ناس كتير ..

#الشاهد
حافظ على فلوسك وبضاعتك لأطول فترة ممكنة ووزع كوتة
وزع كوتة وزع كوتة وزع كوتة……….
على دراسة خطوط ولو تاجر اعكس النظام ولازم يكون عندك حصة من مخزون السوق 

دي كلمة صديق قالها وبيشتكي بقى من الآجل اللي له برا مع إني والله محذره وقايله بلاش ..

في الآجل دلوقتي إنت بتخسر ٣ مرات :
– مكسبك
– بضاعتك
– رأس مالك

طيب عندي منتجات وعاوز ابيع ولازم آجل زي الفل بيع السعر x3 أو x4 أو x5
ودا مع المنتجات الأكثر طلباً للآجل بس ليها طريقة مرسومة هنعمل لها بوست لوحده

أخطر حاجة بقى للآجل هي تحويل مخزون السوق من عندك للوسطاء والتجار خليني أقولك من ستتين لفينا مصر من إسكندرية لأسوان لأحد العملاء علشان نعالج مشكلة مخزون السوق ونرجعه المصنع وازيدك من الشعر بيت شغله كان كاش 

هحكيهالك بعدين تستفيد منها 

ماذج الإيرادات لا تقل أهمية عن عوائد المبيعات
والفترة اللي جاية كل سم في مشروعك لازم تعمل منه نموذج إيراد.
بالأخص الناس اللي عندها خطوط توزيع

خليني أقولك لو عندك مشروع أو حابب تفتح مشروع فلازم تعرف كويس جداً الفرق بين سوق دولة وسوق المجتمع اللي بالمناسبة هو الملاذ الآمن حالياً ومستقبلاً..

نرجع تاني دراسة السوق اللي هتظهر لك الفرصة بس قبل ما تقولك نفذ هتعرفك التالي :

 قانون السوق الفعلي اللي هتشتغل فيه .
 هتدخل السوق تحت حماية مين ؟ حتى لو كنت رامبو 
 قوانين البيع الفعلي للمناطق المستهدفة
 السوق السوداء الفعلية وليس الوهمية
 الدراسات الفنية المربحة
 والكثير من أسرار السوق

طيب دراسة الجدوى على ورقنا بتقول :
 تأسيس
 وأصول
 خطة إختراق
 دوران رأس مال
 تسويق
 مستهدف بيعي
 تسعير
دراسة فنية
 وحاجات كتير

دراسة السوق قبل دراسة الجدوى ولو معاك مال قارون ممكن تقولك انت وتفكيرك ما تنفعش للمشروع ولا للسوق اصلاً ومكن تخليك تكسب دهب من التراب .

 علشان كدا فيه مشروعات بتقوم على دراسات جدوى وبتفشل لأن دخول السوق وعوامله المؤثرة في الواقع مختلفة

لكن السؤال هو فيه عوامل مؤثرة في السوق غير عوامل سوق الدولة ؟

صباحك جميل 

دا السؤال اللى على طول بتسأله وعلى طول بتكون إجابتي لا
مع إن فضل الله كبير فى رؤية فرص كيرة وكويسة بس السؤال بالطريقة دي مسبقاً دا مشروع مشروع فاشل أه والله زي ما قرأتها كدا بس ليه ؟ :

– اللي بيسأل السؤال دا بعد الكلام دا معظمهم كسول فكرياً وحتى حركياً

– مهما عرضت على الشخص دا فهو ماعندوش أي قابلية إنه يطور المعلومات اللى هياخدها فهيقف عندها وبالتالي هيحملك المسئولية فى النهاية .

– نسبة 70 % من اللى جاي بمشروع معين هو جاي علشان حماده بن خالته أو صاحبه شغال فيه وهو ماسعاش ب3 جنيه يعرف حاجة عن السوق .

– الحاجة الأهم هو ماعندوش إستعداد يصرف جنيه على دراسة سوق أو دراسة جدوى أو حتى ينزل بنفسه يجمع معلومات ويتعب شوية جسدياً ومادياً

– من الحاجات الجميلة بردو فكرة أنا عاوز أفتح جنب البيت فحتى لو فيه فرصة قدامه في مكان بعيد شوية بيرفضها .

– معظم المشروعات اللي بتيجي دراسات جدوى مثلاً في إختبار الشخص اللي بنقوم بيه قبل ما نتكلم فى المشروع نفسه والله العظيم نسبة 90 % بيفشلوا فيه مع إن تلاقي يقولك واخد كورسات كذا وكذا وكذا وتيجي تكلمه بواقعية يقولك إنت بتسودها ياعم لا والله أنا بقولك اللى هتشوفه مسبقاً كلام الكورسات حلو وكل حاجة بس انت هتبقى صاحب مشروع .

– خلى بالك بس دي آخر فلوس معايا او دا كل ما أملك أو اانا مش معايا فلوس بس هتصرف دي كلمات جميلة بنسمعها وهي أول دلائل بردو إن دا مشروع مشروع فاشل .

– كله كوم واللى مفكر إن رصيده في البنك هيعد بمجرد التفكير فى المشروع .

– طيب تدفع فلوس في إستشارة نقعد نفكر وتخطط في المتاح وفقاً لإمكانياتك ؟ لا انا هدفع فلوس علشان أعرف حاجة دا أنا بسألك بس .

أنا ممكن أقعد أعد لك أسباب من هنا لساعتين قدام من اللى بشوفه كل يوم .

من فترة على الصفحة دي قلت إن فيه فرصة مشروع السوق بتاعه متاح ومحتاج وفيه عجز كبير جداً نتيجة مؤثرات كبيرة جداً معظم اللى تواصل معايا لما طلبت منه إن أي معلومة هقدمها بفلوس سكت أه والله العظيم سكت .

علشان كدا إجابة السؤال دايماً بتكون : لا

ويبقى السؤال مع عدد الناس دي كلها هل السوق المجتمعي في مصر هو الملاذ آمن للإستثمار في الوقت الحالي ؟