مستعد تغير وجهة المشروع كله وتسمع التوصية كاملة بعد ما نخلص ؟
دا سؤال من الأسئلة المهمة اللي بنسأله دايماً للعميل في أول المشروع لأن أحياناً بيكون عنده طاقة عالية قوي للمنتج وما بيفكرش في حاجة تانية وتعالى أقولك القصة دي :
في واحد من مشروعاتنا وإحنا في أسيوط كان فيه تاجر كبير كل الناس بتقولنا عليه ولازم نزوره ولما قعدنا معاه كان مهتم كل شوية بفكرة الغطا الخاص بالريداتير وإيه الجديد بتاعكم وبدأتم تصنيع ولا بس إستيراد ؟
لما بدأنا نتكلم معاه ونسأله ليه الغطا بس اللي بتسأل عنه ؟
حكى قصة من قصص كتير لازم نتعلم منها بس الأول خليني أقولك فى الوقت دا كنا بنتكلم عن واحد صاحب مركز خدمة سيارات متكاملة وموزع مهم للمنتج في الصعيد وبيستعد علشان يعمل معرض من أكبر معارض أسيوط .
أول ما بدأ شغل التجارة والوساطة إكتشف إن فيه مشاكل كبيرة بتقابل الصنايعية فى الغطا وإنه كقطع غيار وإكسسوار مش متوفر على طول ومن هنا بدأ تجارته .
هو متخصص في عطا الريتداتير بس وبدأ يشوف الأحدث واللي عليه الطلب وبدأ يشتري ويخزن علشان يكون المخزون متوفر بشكل مباشر وبدأ تقريباً يكون الموزع الرئيسي والمشهور بتوفر المنتج عنده ..
في خلال 4 أو خمس سنين كان بدأ يدخل المنتج كامل وباقي الإكسسوار واحده واحده يخدموا على الغطا ثم بدأ يعمل مركز صيانة سيارات وبدأ يدخل خدمات تانية فى المركز وكل خدمة بما لا يؤثر على توزيعه للمنتج الرئيسي ولا يخسره باقي المنافسين كعملاء .
وكان بيقول أنا مدين لربنا ثم لغطا الريداتير فى كل اللى وصلت له .
#الشاهد :
مش لازم تدخل السوق دايما فارد عضلاتك ولا تدخل لمنتج رئيسي في حين ممكن تبدأ ريادتك للسوق من منتج الناس ما بتهتمش بيه رغم أهميته لكن الفرصة هنا وإستغلالها .
وهنا السؤال المهم إزي وصلنا إننا نقعد ونحكي وإيه اللى خلاه يتكلم الكلام دا كله ويشرح لنا ؟
صباحك جميل يا صديقي .
